Xizmên Windayan peyama lêgerîna aqûbetê dan
AMED/ÊLIH (DÎHA) - Şaxên ÎHD û Xizmên Windayan, li Amed û Êlihê di hefteya 401’emîn de li aqûbeta windayan pirsîn û biryara tekoşina lêgerînê dan.
Çalakiya Şaxa Komela Mafê Mirovan (ÎHD) a Amedê û xizmên windayan bi dirûşmeya "Bila winda bên dîtin, kiryar bên darizandin" di hefteya 401'emîn de li avahiya ÎHD’ê çalakiya xwe berdewam kirin. Di çalakiyê de xizmên windayan, endam û rêveberên ÎHD’a Amedê û gelek kes amade bûn. Di çalakiya vê hefteyê de Serokê Giştî yê berê yê ÎHD Husnu Ondul û parazvanê mafê mirovan Feray Salman jî cih girt. Di çalakiya vê heftê de jî dayikan wêneyên windayan xistin hembêza xwe û gelek wêne jî li erdê raxistin. Di çalakiyê de ewil Serokê ÎHD'a Amedê Racî Bîlîcî axivî û diyar kir ku ew ê têkoşîna xwe ya lêpirsîna windayan berdewam bikin.
‘Me peyama dayikan bir Arjantînê’
Serokê Giştî yê ÎHD'ê yê berê Husnu Ondul jî axivî û destnîşan kir ku wî peyamên xizmên windayan di hefteya 600'emîn de ji dayîk û xizmên windayan Arjantînê re biriye û wiha got: "Li Arjantînê jî piştî darbeyê gelek kes hatin wendakirin. Me peyamên malbatên ji Kurdistan û Tirkiye yê di hefteya 600'emîn de gihand wan. Em ê heta dawiyê li cem xizmên windahiyan bin. Dê ew malbat çawa li 500 zarokên xwe dipirsin em ê jî li cem malbatên xwe yên ku li xizmên xwe dipirsin bin."
‘Em ê lêgerîna xwe bidomînin’
Parazvana mafê mirovan û Kordînatora Platforma Hevkar ya Mafên Mirovan Feray Salman jî têkoşîna 25 salan a lêgerîna malbatan bi bîr xist û ev tişt got: "Ev 25 sal e bi nedîtina windayan îşkence û muameleya nebaş li xizman tên kirin. Divê kesê ku ev sûc pêk anîbe bên cezakirin. Kirina vê çalakiyê ku niha di hundirê odeyekê de tê kirin nayê qebulkiri. Em ê lêgerîna xwe berdewam bikin."
Çîroka Sûsayê hat xwendin
Piştî Salman, parêzerê ÎHD’a Amedê Hasan Yalçin çîroka vê heftyê xwend û got: "Di sala 1992'an de li gundê Sûsa yê Farqînê hin buyer rû didin. Ji ber vê bûyerê di nava gund de dengê gundiyan li hev bilind dibe. Li gund tirsek mezin heye û ji ber ewlehiya xwe hin malbatan gund terikandine. Piştî buyerê bi 2 mehan Mehmet Habîp Fîdanci, Mehmet Nurî Fîdanci, Ahmet Fîdanci û Vedat Fîdanci ji bo ku mehsûlê xwe rakin diçin gund. Pêşiya malbata Fîdanci dema ji çandiniyê vedigerin li derdora gundê Weysika Jorî di saet 11.00'an de ji aliyê 13 kesên rûpoşkirî tê birîn û dest û piyên wan girê didin û wan li ber çavên malbata wan înfaz dikin. Piştî buyerê gilî li Fermandariya Cendirmeyan tê kirin û cendirme tên ku cenazeyan otopsî bikin. Ji wê demê ve tû agahî ji kujeran nehatiye girtin."
Komê piştî xwendina çîrokê 5 deqîqeyan çalakiya runiştinê pêk anîn.
ÊLIH
Li Êlihê jî Şaxa ÎHD'ê û xizmên windayan wek her hefteyê li kolana Gulîstan li ber Abîdeya Mafê Mirovan çalakiya bi slogana “Bila winda bên dîtin û kiryar bên darizandin” di hefteya 401’emîn de domandin û aqûbeta windayan pirsîn. Gelek parazvanê mafê mirovan û Xizmên Windayan beşdarî çalakiyê bûn wêneyên zarok û xizmên xwe windayî hildan û li erdê raxistin.
‘Pêvajo ji salên 90’î bihûriye’
Di çalakiyê de Serokê Şaxa ÎHD’a Êlihê Mehmet Bagatir axivî û anî ziman ku wan 21 sal li pey çalakiyên xwe hiştin û wiha got: “Li gel vê yekê em hêj li windayan dipirsin. Bila kes nebêje em ê windayan ji bîr bikin. Her çiqas darbe û rewşa awarte hatibe rakirin jî lê niha tam serdema rewşa awarte û darbeyê ye. Di vê pêvajoyê de gelek pêkanînên dij hiqûqî pêk tên û pêvajo ji salên 90’î bihûriye.”
Bagatir êriş û darbeya li dijî çapameniya azad û hemû beşên civakê bibîr xist û got ku ew di serdemek dijwar de derbas dibin û her roj binpêkirina mafan pêk tê.
Piştî daxuyaniyê 5 deqîqeyan rûniştin û dawî li çalakiyê anîn.
(dy-ua/bg/mae)
