Rojnamegeran peyama xurtikirina têkoşînê dan
AMED (DÎHA) - Cemiyeta Rojnamegerên Azad û xebatkarên televîzyonên ku hatin girtin bi daxuyaniyê li dijî girtina weşanan nerazîbûn nîşandan, girtina televîzyon û radyoyan wekî darbeya li dijî çapemeniyê bi navkirin û anîn ziman ku ku ew ê rojnamegeriyê bidomînin û têkoşînê xurtir bikin.
Bi pêşengiya Cemiyeta Rojnamgerên Azad (CRA) boneya balê bikişîne ser girtina televîzyon û radyoyên ji aliyê hikûmeta AKP’ê ku hatin girtin, bi beşdariya nûner û rêveberên televîzyonên wek Azadî TV, Jiyan TV, Zarok TV, Van TV, Denge TV, Hayatin Sesî TV, TV10 û gelek sazî û dezgehên din an hatin girtin û rastî astengiyan civîna çapemeniyê li darxist. Civîn li Salona Resepsiyonê ya Sûmer Parkê pêk hat. Rêveberên CRA, bi dehan rojnamevan, xebatkar û rêveberên telvîzyonên hatin girtin, rêveberên rêxistinên KCD, HDP û DBP ên Amedê, nûnerên saziyên civakî yên sivîl û Hevşaredarên Bajarên Mezin ên Amedê Gultan Kişanak û Firat Anli û parlementerê HDP’ê yê Amedê Ziya Pîr amade bûn û piştgiriya xwe ji bo saziyên hatin girtin dan nîşandan.
Gelek endamên çapemeniyê jî eleqe nîşanî civînê dan û balkêş bû ku derdora Sûmer Parkê ji aliyê polîsan ve hatibû dorpêçkirin.
Di civînê de ewil Hevserokê CRA’yê Haki Boltan axivî û diyar kir ku êrîş û girtina li dijî televîzyon û radyoyan pêk hatiye darbeya li dijî çapemeniya azad e û got ku dê ev darbeya li dijî çapemeniyê wek deqek rûreşiyê di dîroka Tirkiyê de cih bigire.
‘Em ê ranewestin’
Piştî Boltan, Nûçegihana Van TV a Amedê Hulya Emeç jî axivî û girtina li dijî van televîzyonan êrîşa li dijî çand, ziman, nasname û nirxên gelê kurd nirxand û wiha got: “Tu kes nikare me bi van êrîşan rawestîne û em ê ranewestin. Em bi van êrîş û girtinan natirsin. Yên ku dibêjin wê çapemeniya kurd û xebatkarên wê bitirsin xwe dixapînin. Em ê qet netirsin û nivîsandina rastiyan bidomînin.”
‘Bi girtina Azadî TV dê bisernekevin’
Di civînê de Derhenerê Weşana Giştî yê Azadî TV Îrfan Uçar jî bertekên xwe li dijî êrîşên li ser çapemeniya azad û televîzyona xwe anî ziman û di berdewamiya axaftina xwe de bal kişand êrîşên ser çapemeniyê û piştî hewldana darbeyê pêkanînên li dijî çapemeniya kurd pêk tên. Uçar anî ziman ku dê ev êrîş di dîroka Tirkiyê de wek şermê bê zanîn û axaftina xwe bi van gotinan bi dawî kir: “Kes nikare me asten bike. Her ku biçe em ê rojnamevaniyê bikin û rastiyan derxibin holê. Kes bi girtina Azadî TV û Zarok TV bi sernakeve.”
‘Bêtehamuliya li dijî kirmanckî ye’
Kordînatorê Weşana Jiyan TV ya ku bi kirmanckî weşanê dike Îbrahîm Aslan jî bilêv kir ku û êrîşa li dijî televîzyona wan û TV’iyên din bêtehamûliya li dijî zaravayên kurdî ne û got ku wan tenê weşana bi zimanê kirmanckî ya daxwaza mafê mirovan, demokrasiyê û wekheviya gelên demokratîk dikir. Aslan girtina Jiyan TV darbeya li dijî zimanê kirmanckî pênase kir û got ku kes nikare dengê gelan qut bike.
‘28’ê îlonê darbeya li dijî çapemeniyê ye’
Nûnerê Hayatin Sesî TV ê Amedê Cumhur Daş jî axivî û da zanîn ku êrîşa di 28’ê îlonê de li dijî çapemeniyê û TV’iyan pêk hat darbeya li dijî çapemeniyê û got ku ew ê weşangeriya dengê gelan, karkeran û kedê bidomînin.
‘Hemû kesî kirine hedefa xwe’
Serokê Şaxa ÎHD’ê ya Amedê Racî Bîlîcî jî nêrînên xwe anî ziman û got ku ji ber van televîzyonan hemû rastiya herem û Rojhilata Navîn dianîn ziman û weşan dikirin hatin girtin û got ku wan jî wek ÎHD’ê ji van weşanan geşedanên diqewimîn ji van weşanan dibihîst. Bîlîcî bibîr xist ku beriya van pêkanînan û piştî îlankirina OHAL’ê hemû sazî, alî û saziyên çapemeniyê rastî êrîşan hatin û got ku mafê mirovan biserbikeve.
‘FETO çû niha jî RETO hat’
Herî dawî jî di civînê de Hevşaredara Bajarê Mezin a Amedê Gultan Kişanak û Parlementerê HDP’ê yê Amedê Ziya Pîr jî axivîn û piştgiriya xwe ya ji bo çapemeniya azad anî ziman. Pîr di axaftina xwe destnîşan kir ku ew ê darbeya li dijî çapemeniyê qebûl nekin û wiha got: “FETO çû niha jî RETO hat.”
Daxuyanî bi lêdana çepikan bi dawî bû.
(kom/bg/sa)
