'Em ê meha bê federaliyê îlan bikin'
DÊRIK (DÎHA) - Hevserokê Meclîsa Damezrêner a Sîstema Federaliya Demokratîk a Rojava-Bakurê Sûriyeyê got ku ew ê meha bê sîstema federaliya demorkatîk îlan bikin û di mehên pêş de jî Meclîsa Federaliya Demokratîk damezirînin.
Di nûçeya ANHA'yê de Hevserokê Meclîsa Damezrêner a Sîstema Federaliya Demokratîk a Rojava-Bakûrê Sûriyeyê Mensûr El-Selûm diyar kir ku ew ê meha bê Sîstema Federaliya Demokratîk îlan bikin.
El-Selûm bal kişand ku projeya wan ji gelek aliyan ve rastî êrîşan tê û gelek alî îdîa dikin ku ev projeyeke parçebûnê ye, ji ber vê yekê ew projeyê ji hemû beşê civakê re şîrove dikin.
El-Selûm got ku ew bêyî vîna gelê xwe tu caran biryaran nastînin û di hemû biryaran de nerîn û pêşniyarên gelên herêmê di ber çavan re digrin. El-Selûm got ku di aliyî de komên wan li gorî bernameyekê li hersê kantonên Rojava xebatan didin meşandin.
Meha bê federalî tê îlankirin
El-Selûm diyar kir ku ew meha bê ango cotmehê wê bi Meclîsa Rêveber û Meclîsa Zagonsaz ên Kantona Cizîrê re rûnên, reşnivîsa Hevpeyman Civakî nîqaş bikin, guhertinên pêwîst jî bikin û projeya Federaliya Demokratîk fermî ragihînin.
Di dema pêş de hilbijartin hene
El-Selûm anî ziman ku amadekariyan dikin da ku di nava mehên pêş de, Meclîsa Federaliya Demokratîk hilbijêrin. El-Selûm wiha got: “Hilbijrtin giştî ye. Wê ji jêr ve pêk were, ango ji komînan destpê bike. Tenê ev gel dikare çarenûsa xwe diyar bike. Meclîsa Yekîtiya Demokratîk a Rojava-Bakûrê Sûriyeyê wê bibe nûnerê vî gelî.”
Armanc Neteweya Demokratîk e
El-Selûm hikmê navnedî ku bi dehan salan gelan gelek êş û azar jê dîtiye, red kir û wiha axivî: “Em dixwazin ku gelê Rojava xwe bi xwe birêve bibe, armanca me avakirina Neteweya Demokratîk û pêşxistina biratiya rasteqîne ye. Em dixwazin ji herêmê re bibin mînak û hemû rêbendên ku hevpeymana Syks-picot li ser gelê me ferz kiriye, bişkînin. Em dixwazin ku tevgera me bibe tevgereke civakî û civakeke durist ku tê de aştî, hezkirin û biratî hebe, ava bikin."
(sa)
