Muslîm: Azadî bi têkoşînê pêkan e
NAVENDA NÛÇEYAN (DÎHA) - Hevserokê PYD’ê Salîh Muslîm di mîtînga Strasboûrgê de axivî got ku azadî tenê bi têkoşînê pêkan e.
Piştî meşa li bajarê Strasboûrgê yê Fransayê ku bi armanca daxwaza azadiya Rêberê PKK'ê Abdullah Ocalan û protestokirina qeyûmên AKP’ê hate lidarxistin, mîtîng hat lidarxistin. Hevserokê PYD’ê Salîh Muslîm di mîtînga Strasboûrgê de axivî û diyar kir ku azadî bi têkoşînê pêkan e.
'Em bi gelê kurd re ne'
Parlamenterê berê yê Parlamentoya Ewropa û Serokê Rûmetî yê Koma Çep Francîs Wûrtz di mîtîngê de axivî û destnîşan kir ku li cem gelê Kurd in.
'Gelê kurd li çar parçeyên Kurdistanê li ber xwe didin'
Hevserokê PYD’ê Salîh Muslîm di axaftina xwe de berxwedana gelê kurd silav kir û peyam da ku azadî tenê wê bi têkoşînê mimkûn be. Salîh Muslîm got Kurd li her çar parçeyên Kurdistanê jî li ber xwe didin, wiha dewam kir: “Şervanên Kurdistanê îro li Rojava, Şengalê û bakur şerekî dijwar dimeşînin.”
Muslîm destnîşan kir ku berxwedana gelê kurd û rêberê wan wê heta azadiya Ocalan bidome. Muslîm êrîşên dagirkirinê yên ku çeteyên DAIŞ’ê beriya niha 2 salan li dijî Kobanê li dar xistibûn bi bîr xist, got ev bi berxwedanek 144 rojan hate pûçkirin.
Muslîm anî ziman ku Ocalan ew lîder e ku tevahî berxwedanên li Kurdistanê bi rêxistin kiriye, rê li ber felsefeya wê xistiye, ji her kesên ku doza mafên xwe dike xwest ku li ber xwe bidin.
Muslîm bal kişand ku rêveberiya Tirk ji bilî êrîşên li dijî Rojava, li bakurê Kurdistanê jî destûra ti rêbaz û têkoşîna demokratîk û aştiyane nade, destnîşan kir ku ji bilî berxwedanê ti rêya din ji gelê Kurd nehatiye hiştin.
Muslîm bang li welatên Ewropî jî kir kul i cem Ocalan û gelê Kurd cih bigirin.
'Ocalan îradeya gel e'
Hevserokê KONGRA-GEL Remzî Kartal jî bal kişand ser tecrîda li ser Rêberê PKK'ê Abdullah Ocalan a li Îmraliyê, destnîşan kir ku Ocalan îradeya gel e. Kartal wiha got: “Rewşa Serok Ocalan bi rastî jî pir krîtîk e." Kartal bang kir ku ji bo Ocalan çalakiyan zêde bikin.
Kartal her wiha li ser êrîşên li dijî îradeya gel a li Kurdistanê jî rawestiya, ragihand ku wê gelê kurd li dijî van êrîşan çokan neşkîne.
Kartal bi bîr xist ku dewleta tirk ji bo destkeftiyên gelê kurd tine bike welat bi welat digere, destnîşan kir ku AKP’e dijminahiya xwe ya li dijî Kurdan bi ser avê xistiye.
Banga xwedîlêderketina Ocalan
Li ser navê Tevgera Jina Kurd a Ewropa (TJK-E) Dilşa Osman axivî û bal kişand ser hewldanên Ocalan a ji bo azadiya jinên kurd. Osman destnîşan kir ku wê li dijî dîlgirtina Ocalan tehamul nekin, bang li jinên kurd kir ku li dijî tecrîdê têkoşînê mezin bikin.
Di mîtînga Strasboûrgê de li ser navê Konseya Suryaniyên Ewropayê jî Sûphî Aksoy axivî, têkoşîna hevpar a li dijî rejîmên zextker û paşverû yên li Rojhilata Navîn destnîşan kir, li ser rola diyarker a Rêberê Gelê Kurd rawestiya.
Her wiha li ser navê Yekgirtina Komunîstên Ciwan a Fransa jî nûnerek axivî, got wê li dijî zextên li ser gelê Kurd rawestin. Nûner, her wiha li ser felsefeya Ocalan a ku jiyana hevpar a gelan esas werdigere jî rawestiya, peyam da ku wê li cem gelê kurd bin.
Mîtînga li Strasboûrgê wê bi stranên hunermendên kurd bi dawî bibe.
(sa)
