Baluken: Heta tecrîd hebe, dê têkoşîna me bidome
NAVENDA NÛÇEYAN (DÎHA)- Serokwekîlê Koma HDP'ê Îdrîs Balukên û li mîtînga Strasboûrgê axivî û got heta tecrîd hebe, ew ê jî têkoşîna xwe ya li dijî tecrîdê bidomînin û heta encamê bigirin dê çalakiyên xwe bidomînin.
Li bajarê Strasboûrgêya Fransayê kurdistaniyan piştî meşê mîtîng li dar xistin. Di destpêka mîtîngê de Hevserokê KCDK-E Yuksel Koç axivî û diyar kir, ew ê ji daxwaza xwe ya azadiya Rêberê PKK'ê Abdullah Ocalan tawîzê nedin.
'Azadiya Ocalan bi azadiya Ocalan pêk tê'
Rêveberên Meclîsa Şengalê ya Dîasporayê jî, ku 21 rojan di greva birçîbûnê de bûn, li mîtîngê axivîn. Li ser navê meclîsê Fîkret Îgrek axivî û destnîşan kir, ku azadiya Şengalê bi azadiya Ocalan dibe. Îgrek diyar kir, hemû gel û baweriyên li Rojhilata Navîn bi saya felsefeya Ocalan ji qirkirinê rizgar bûne.
Fîkret Îgrek da xuyakirin, ku ew ê çalakiyên xwe yên ji bo azadiya Ocalan û statuya Şengalê bidomînin û banga berxwedanê li gelên li Bakur, Başûr û Rojavayê Kurdistanê kir.
Ji çalakgerên greva birçîbûnê Peşîmam Ekrem Denîz jî ji Kurdan xwest, ku baweriya xwe çi dibe bila bibe, bibin yek û daxwaza azadiya Ocalan kir.
'Heta encam bê girtin dê çalakî bidomin'
Serokwekîlê Koma HDP'ê û Endamê Heyeta Îmraliyê Îdrîs Balûken jî axivî û da zanîn, bi saya berxwedana li Kurdistan û tevahiya cîhanê, AKP neçar ma ye destûra hevdîtina bi Ocalan re bide. Balûken bal kişand ser bandora greva birçîbûnê ya li Strasboûrgê û hemû çalakiyên din û anî ziman, ku ev çalakî têrê nakin Balûken bibîr xist, ku sîstema tecrîdê ya li Îmraliyê, ku li derveyî mirovahiyê ye, dewam dike.
Balûken ê got "Heta ku tecrîd bidome, em ê bi ti awayî paş ve gavê navêjin" destnîşan kir ku divê li çar aliyên cîhanê, heta encam bê bidestxistin, çalakî werin lidarxistin.
Îdrîs Balûken da xuyakirin, ku her kes baş dizane bê Ocalan ji bo gelê Kurd û demokrasiya Tirkiyeyê tê çi wateyê û ragihand, xeta ji aliyê Ocalan ve hatiye afirandin, li dijî zîhniyeta DAIŞ, El Nûsra û AKP'ê têkoşîneke xurt li Rojhilata Navîn dimeşîne.
Balûken wiha got: "Yên vê tecrîdê dimeşînin, ew kes in ku destekê didin DAIŞ'ê" û anî ziman, divê ev yek ji civaka navneteweyî û gelên cîhanê re bê ragihandin.
Balûken diyar kir, ji Şêx Seîd û Seyîd Rizayan û vir ve gelê Kurd nîşanî tevahiya cîhanê daye ku wê serî netewîne û ragihand, bi komkujiyên li Cizîr, Sûr û gelek bajarên din re hat xwestin, serî li Kurdan bê tewandin. Balûken gotina Mehmet Tûnç ku gotibû 'wê me qetil bikin, lê ti carî nikaribin me teslîm bigirin' bibîr xist û destnîşan kir, ku gel wê serî netewîne.
Îdrîs Balûken diyar kir, faşîzma AKP'ê bi merasîmeke radestkirinê, li Cerablûsê ketiye şûna DAIŞ'ê û got, faşîzma Erdogan bi rengekî vekirî nîşan daye ku dixwaze hemû destketiyên Kurdan tine bike. Balûken işaret bi êrîşên li Bakurê Kurdistanê jî kir û anî ziman, ku bi rêya qeyûman şaredarî hatine desteserkirin û êrîşa li dijî vîna gel derketiye asta herî bilind.
Balûken da xuyakirin, ku AKP hewl dide desteserkirina şaredariyan û hemû zextên tên kirin weke rewşeke normal nîşan bide.
(sa)
