Dê bi çalakiya dengderxistinê piştevaniya greva birçîbûnê bê kirin
AMED (DÎHA) - Navenda Giştî ya DBP'ê, di talîmata ku bo hemû rêxistinên xwe yî bajaran şan de, bo xwedîtiya greva birçîbûnê ya ku bi daxwaza bila hevdîtin bi Rêberê PKK'ê Abdûllah Ocalan re pêk bê hat destpêkirin, xwest her êvar saet di 21.00'an de çalakiya dengderxistinê bê lidarxistin û pêşnûmaya wê bê amadekirin. Her wiha ji bo serdana çalakgerên greva birçîbûnê jî, pêşnûmeyek hat amadekirin.
Navenda Giştî ya Partiya Herêmên Demokratîk (DBP), têkildarî greva birçîbûnê ya bêdem û bêdorveger ku li Amedê bi daxwaza bila hevdîtin bi Rêberê PKK'ê Abdûllah Ocalan re pêk bê hat destpêkirin, bi awayekî nivîskî daxuyaniyek da. Di daxuyaniya ku derbareyê greva birçîbûnê ya ku ji aliyê 50 kesên dildar ve hat destpêkirin de wiha hat gotin, "Li Tirkiyeyê geşedanên vê sala dawî û bi taybetî yên ku piştî hewldana derbeya 15'ê Tîrmehê xwe dan der, her diçe şik û gumanên civakê û yên me zêde dikin. AKP û Erdogan ji bo parastina îktîdara xwe welat û civakê ber bi feleketeke nediyar ve dibin. Dema meriv di vê sala dawî de li rûxandin, komkujî û pevçûnên li Kurdistanê dinihêre, bi encamên xwe bi awayekî aşkere xwe dide der ku ev rewş pêkanînên şerî jî derbas kirine."
Di berdewamiya daxuyaniyê de wiha hat gotin:
"AKP'ya ku bi polîtîkayên rageşiyî xwe xwedî dike, ji 5 nîsana 2015'an heta niha bi tecrîda giran a arasteyî Rêberê PKK'ê Abdûllah Ocalan, vê rageşiyê dide der. Li dijî ked û hewldanên Birêz Ocalan ên arasteyî çareserkirina demokratîk û lihevkirinê, hikûmet bi tecrîdê nêz dibe ku ev jî nêzîkatiya hikûmetê ya di warê çareseriya demokratîk de di der.
Di vê rewşa heyî de, li ser bangewaziyên gelê me, partiya me, saziyên me û siyasetmedarên me ên têkildarî tenduristî û ewleyiya Birêz Ocalan heta niha hikûmet bersivên tetmînkar nedane û ji ber vê jî her diçe şik û gumanên me zêde dibin.
Têkildarî tenduristî û ewleyiya Birêz Ocalan ji bo tedbîr bên girtin û dawî li tecrîda giran bê, arasteyî greva birçîbûnê ya bêdem û bêdorveger a di 5'ê îlonê de li Amedê hat destpêkirin, di serî de rêxistinên me yî bajar-navçeyên em bang li hemû gelê me, hawirdorên demokratîk, rewşenbîran dikin da bêdeng nemînin.
Divê hemû rêxistinên me yî bajar û navçeyan ji bo xwedîderketina li greva birçîbûnê ya mezin demildest li hemû herêman bi awayekî hevpar li hemû partî û saziyan plana bernameyên xwe yî çalakiyan bikin û bi cih bînin. Bes em qala çalakiyeke tenê ji bo carekê ye nakin. Heta greva birçîbûnê bi serketinê bi dawî bibe, divê em dengê xwe bilind bikin.
Wek Navenda Giştî ya DBP'ê li gor mêjûyên ku li jêrê hatine diyarkirin dê rêxistinên me yî bajaran bi girseyeke xurt xwedî li hevalên me yî ku ketine greva birçîbûnê derkevin û bi mebesta piştevaniyê serdana wan bikin."
12'ê Îlonê - Amed navend
13'ê Îlonê - Amed hemû navçe
14'ê Îlonê- Wan
15'ê Îlonê- Mûş
16'ê Îlonê - Çewlig
17'ê Îlonê - Bedlîs
18'ê Îlonê - Qers û Erdexan
19'ê Îlonê - Agirî û Îdir
20'ê Îlonê - Sêrt
21'ê Îlonê - Dîlok
22'ê Îlonê - Meletî û Xarpêt
23'ê Îlonê - Gurgum û Semsûr
24'ê Îlonê - Dersim
25'ê Îlonê - Mêrdîn
26'ê Îlonê - Êlih
27'ê Îlonê - Riha
28'ê Îlonê - Şirnex
29'ê Îlonê - Colemêrg
30'ê Îlonê- Erzirom
Di dawiya daxuyaniyê de hat diyarkirin ku dê her êvar bi awayekî hemwext rêxistinên bajar û navçeyan saet di 21.00'an de çalakiya dengderxistinê li dar bixin.
(red)
