Elewîy do Metînerî gerre bikerêy
MUSTAFA YUKSEL
SEMSÛR (DÎHA) - Merdimên hukûmatî lezê nijadperesteya xo nêşkenê firên bikê û firên înan teqayo. Keyê ceman, Metîn Metîner ke wekîlê AKPî yê Semsûrî yo, kerd 'cayê terorîstan' ra sazî û dezgey elewîya bertek mojnenêy.
Wekîlê AKPa Semsûrî Mehmet Metîner ser keyeyên cemî vatbî ke 'keyeyên cemî halûna terorîstî yo.' no vatişî ra Serekê Sazîya Kultura Pîr Sultana Abdala Semsûrî (PSAKD) Mahmut Yapici bertek mojna û vat ke ey seba ke Metîner Semsûrî de wekîl bîyo û no rewşê ra zî zaf şerm keno. Semsûrî de heme sazîyên elewîyî heqî Metînerî de gerrekerdoxeya xo do bîyarê ziwan.
Yew bernameya televîzyonî de Wekîlê AKPa Semsûrî Mehmet Metîner qise xo de vat bi ke 'keyeyên cemî haluna terorîstî yo.' no vatişê Metînerî ser Semsûrî de heme sazîyên elewîyî Metînerî ra bertekêy xo mojnay. Mijar ser Serekê Sazîya Kultura Pîr Sultana Abdala Semsûrî (PSAKD) Mahmut Yapici vat ke keyeyên cemî de Homa, Muhammet û Alî her tim yenîy vîrardişî û wina vat: "Metînet bi qetî heqî elewîtî û keyeyên cemî de çik nêzano û no ser zî tabîrî 'keyeyên cemî halûna terorîstî yo.' şixulnayo. Asil terorîsî êy xelq kenêy. Kese ke no vatişê 'keyeyên cemî halûna terorîstî yo.' vato, ez Semsûrî de wekîl bîyîşî ey ra şerm veynena. Ma heqî Metînerî de bi qetî gerrakerdoxêy."
Ma ey diqet nêgirewt
Hewna mijarî ser de Serekê Wexfa Kultura Haci Bektaşa Velîya Anadoluyî Nusret Tunç zî vat ke AKPij Metîner cuyayişê xo de her tim 'zikzak' xêz kerdo û no şeklî de zî rant qezenc kerdo û wina domna: "Armancê Metîner şov o, hetanê nika qet welatij elewîyan Metîner diqet nêgirewtêy û ey hesab daxî nêkerdêy. Hetta nika ma ey qet kombîyayişên xo ra dawet nêkerdo û ma do dawet zî nêkerêy. Eke destê ey de îdayê xo ser belge est o se, wa şêro dozgeran ra teslîm bikero û wa mêşêro televîzyonan de şov mêkero û ma bi qetî peynîya no vatişê zî nêverday. Ma bi qetî Metînerî ra gerrakerdox bibêy. Ma bi qetî Serekwezîr mijarê elewîtî de samîmî nêveynenîy. Ma bi taybetî wazenêy keyeyên cemî bibo cayê îbadetxaneyî. Hukûmat elewîyan ser çi pakêt hadre bikero zî ma zanenêy miyanî nêy pakêtan veng o û no ser zî ma no pakêtan nêşinasnenêy."
(aw)
