Bi hezaran kes qirkerdişê Madimakî nalet kerdî
DÊRSIM (DÎHA) - Platforma Hetkareya Dêrsimî semedê vîrardişê serra 20'in ya qirkerdişê Madimaka Sêwasî meşa şermezarî organîze kerd.
Platforma Hetkareya Dêrsimî qirkerdişê Sêwasî emser zî şermezar kerd. 20 serrên qirkerdişî bîyo. Parka Seyît Rizayî ra heta Parka Gola Çetoyî meş organîze kerd. Şaredara Dêrsimî Edîbe Şahîn, Şaredarê Pêrtagî Kenan Çetîn, BDP, EMEP, ESP, HDK, HDP, Partîzan, Yewbîyayişên KESKî, ayverên DHFî û bi hezar şar beşdarê meşî bîy.
Rayîrî de zaf rayan; 'Şehîdên Sêwasî nêmerdêy', 'Her ca Licê her ca xoverdayiş', 'Dewleta qatîl do hesap bido', 'Roj do bêro dewran bigeyro qatilan do hesap bidê', 'Dijî faşîzmî mil bidê milî' û 'Qatîlê Madimakî bîyê wekîlê AKPî' dirûşmeyên qîrayî. Sewbi pankartên de zî; 'Roşnîya Sêwasî do nêtefîyo' , 'Kesên ke qereqolan virazeno, bendawan zî virazeno.' , 'Gola Çetoyî xirabe keno, Madikakî veşneno, Taksîm ra heta Licê' , 'şimşêra Yavizî va dano û mezgê şolî yo' akerdî. Şar resa Parka Gola Çetoyî û rayî rê zî trafîkî ra qefelnayî. Şar ravêra parkî û yew deqe semedê kesên ameyê qirkedişî yew deqe rêzî da mendî. Şaredarê Pêrtagî dazanayişî wend.
Çetînî ard vîr ke hureynîya qetilkerdoxan ceza bikerê înan bi xelat kerdê û wina vat: "Dewlete çimên xo girotêy ke qetilkarî birehetî bigeyrê û înan ra xelat daya. Pawitoxên qetilkaran ewro AKPî de wekîley kenî. Pey perda elewîtey de kemalîstîy nêvînenê ke pey qirkerdişên Koçgirî, Dêrsim, Gurgum, Madimak, Gazî de zî CHP hevkar o. No zî çîyeke elewîy ger bipersê."
Hevna Şaredar Edîbe Şahînî zî qise kerd û ard vîr ke ewro vîrardişê 20'in ya Madimakî ra xemgînêy û wina vat: "Ma tîyade qirkerdişê Sêwazî lanet kenî. Ma heta ewro semedê dînê xo, kulturê xo ziwanê xo têkoşîn dayê. Nika ra pey de zî ma do bi her hawayî têkoşîna xo dewam bikerê. Heta me azadîya xo nêgî, ma do têkoşîna xo her tim bidomnî."
(ad)
