Rojnameger Bekîroglû: Bi komployekê hatim girtin 

2016-10-08 09:14:21

AMED (DÎHA) - Rojnameger Metîn Bekîroglu yê ku bi hinceta parvekirinên medyaya civakî hat girtin û 52 rojan girtî ma aşkere kir ku, komplo lê hatiye kirin. 

Rojnameger û nûçegîhanê Rojnameya heremî ya bi navê Licê Metîn Bekîroglu bi hinceta li ser rêya malperên civakî  “propagandaya rêxistinê kiriye” hatibû girtin û 52 rojan di Girtîgehê Tîpa D a Amedê ma. Bekîroglu beriya 3 rojan piştî rûniştina dozê ya navberê serbest hat berdan. Bekîroglu anî ziman ku girtina wî bi komployekê pêk hatiye û aşkere kir ku parvekirinên ku ne yên wî bûne wekî yên wî ne hatine nişandan û hatiye girtin.

‘Bi komployekê hatim girtin’

Bekîroglû anî ziman ku ji ber karê xwe yî rojnamegeriyê hatiye girtin û wiha got: “Tu xebatên min ên li dijzagonanî tune ne. Li heremê rojnamegerî zehmet e. Ez bi komployekê hatim girtin.” Bekîroglû da zanîn ku li ser civaka medyayî hesabek li ser navê wî hatiye vekirin û wekî ku parvekirinên di wî hesabî de yên wî bin hatiye binçavkirin û girtin. 

‘Berê jî bi kuştinê gef li min hatibûn xwarin’ 

Bekîroglû bal kişand ser komploya ku lê hatiye kirin û got ku, berê jî ji aliyê Fermandarê Qereqola Cendirmeyan a Angûlê gefên kuştinê lê hatine xwarin. Bekîroglû axaftina xwe wiha berdewam kir: “Di 2004’an de min qertek telefonê ji xwe re kirîbû û pişt re min ew qert betal kir. Niha hesabê ku hatiye vekirin û tê de parvekirin hatine kirin di ser wê qertê de hatiye kirin. Dozger ne li kesê ku niha wê qertê bi kar tîne lêpirsîn vekiriye, lê derheqê min de lêpirsîn da vekirin û ez dam girtin. Ji xwe dizanin ku hesabên min kîjan in jî, lê tevî vê jî ez 52 rojan di girtîgehê de hatim girtin.”

‘Ev parçeyeke ji polîtîkayên tepisandinê ne’

Bekîroglû da zanîn ku tiştê ku bi serê wî de hatiye kirin bi giştî li dijî çapemeniya azad hatiye kirin û axaftina xwe wiha bi dawî kir: “Ev yek polîtikayên tepisandinê ne. Di demên dawî de, em dibînin hemû dengên azad qut dikin. Ez ê li pey vê dosyayê bim. Dawiya vê komployê bigihêje ku bila bigihêje ez ê ji dû vê komployê venegerim.”

(bb-ua/bg/red)